DÍA DO LIBRO

Hoxe, 23 de abril, é un día moi importante para nós, xa que vivimos rodeados de libros de todo tipo. Por este motivo quixemos conmemorar como é debido esta festividade.

Os maiores fixemos carteis para todo o cole nos que explicabamos os milleiros de razóns polas que nos parece importante ler. 

Os máis pequenos e pequenas convertéronse en auténticos escritores/as e despois compartiron cos seus compañeiros/as a lectura da súa obra. Tamén fixeron marcapáxinas e moitísimas máis actividades divertidas.

Dende a Bibioteca Escolar fixéronnos propostas moi interesantes, e nós, que somos moi aplicados/as, levámolas a cabo. Entre todos/as creamos un libro viaxeiro no que cada un de nós explicou o que significaba un libro na súa vida. Esta obra tan nosa, viaxou e segue viaxando por todas as nosas casiñas e cando remate a súa travesía, atracará na nosa biblioteca. Tamén fixemos fotos co noso libro favorito, nas que por certo saímos ben guapas e guapos, para o mural que se vai converter nun anaquiño máis da parede da biblio.

E os maiores aínda temos máis que ensinarvos, pero ata o momento, é un segredo. Estade moi pendentes de nós, que na próxima semana poderédelo descubrir... Mentres esperades, aconsellámosvos que leades moito, moito; xa que, "Para viaxar lonxe non hai mellor nave que un libro" (Emily Dickinson).